ინტიმური ჰიგიენის წესები ჯანმრთელობისთვის
ინტიმური ჰიგიენა ერთ-ერთი ისეთი საკითხია, რომელზეც ყურადღების მოდუნება არ შეიძლება, თუმცა ბევრ ადამიანს ეს თემა მაინც შეუმჩნეველი რჩება. წინამდებარე სტატიაში წარმოგიდგენთ ჰიგიენის მარტივ წესებს, რომელთა დაცვა დაგეხმარებათ სისუფთავისა და ჯანმრთელობის შენარჩუნებაში.
-
როდის მივმართოთ გინეკოლოგს? სპეციალისტები არაერთხელ განმარტავენ, რომ არსებობს სიმპტომები, რომელთა დროსაც ექიმთან ვიზიტი აუცილებელია. ესენია: ტკივილის შეგრძნება, ქავილი და წვა, რაც, შესაძლოა, ბაქტერიული ან ინფექციური დაინფიცირების შედეგი იყოს.
-
საცვლების შერჩევა უმჯობესია უარი თქვათ არაკომფორტულ და სინთეტიკურ საცვლებზე და ისინი ბამბის ქსოვილით ჩაანაცვლოთ. არაბუნებრივი მასალები ქმნის ხელსაყრელ გარემოს საშიში ბაქტერიების რეპროდუქციისთვის (გამრავლებისთვის).
-
შხაპი თუ აბაზანა? ერიდეთ ყოველდღიურ, საფუძვლიან აბაზანას, რადგან ამ დროს არსებობს რისკი, რომ მავნე მიკრობებთან ერთად სასარგებლო მიკროფლორაც განადგურდეს. ჰიგიენისთვის სრულიად საკმარისია მსუბუქი შხაპის მიღება.
-
სიფრთხილე ეპილაციის დროს სპეციალისტები გვირჩევენ, სიფრთხილით მოვეკიდოთ ინტიმურ ზონაში ჩატარებულ ეპილაციას. არაკვალიფიციურმა ჩარევამ შეიძლება გამოიწვიოს თმის ჩაბრუნება, რაც თავის მხრივ იწვევს არა მხოლოდ გაღიზიანებას, არამედ ჩირქოვან აკნესაც.
-
სისუფთავის პერიოდულობა ჯანმრთელობის შესანარჩუნებლად საცვლები დღეში მინიმუმ 1-2-ჯერ უნდა გამოიცვალოთ. ეს მარტივი წესი ხელს უშლის მავნე ბაქტერიების განვითარებასა და გავრცელებას.